सगळी जबाबदारी केंद्राची, मग तुम्ही काय करणार?; चंद्रकांत पाटील यांचा राज्य सरकारला सवाल

सांगली : प्रतिनिधी

राज्यात अतिवृष्टीमुळे झालेल्या नुकसानीच्या पार्श्वभूमीवर भाजपचे प्रदेशाध्यक्ष चंद्रकांत पाटील यांनी राज्य सरकारवर घणाघाती टीका केली आहे. सगळी जबाबदारी केंद्र सरकारकडे, मग तुम्ही काय करणार, असा खोचक सवाल पाटील यांनी केला आहे तसेच मदत करण्याची पहिली जबाबदारी राज्य सरकारची आहे, असे स्पष्ट करीत तातडीने ती जाहीर करावी, अशी मागणीही केली आहे. सांगलीत आयोजित पत्रकार परिषदेत ते बोलत होते. राज्यात अतिवृष्टीमुळे शेतीचे मोठ्या प्रमाणात नुकसान झाले आहे. या पार्श्वभूमीवर महाविकास आघाडी सरकारकडून नुकसानभरपाईच्या बाबतीत केंद्राकडे बोट दाखवले जाते. यावरून चंद्रकांत पाटील यांनी राज्य सरकारला धारेवर धरले. गेल्या वर्षी राज्यात अतिवृष्टी झाली त्या वेळी प्रभारी मुख्यमंत्रिपद देवेंद्र फडणवीस यांच्याकडे होते. त्यातही आमच्या मुख्यमंत्र्यांनी राज्याच्या तिजोरीतून 10 हजार कोटींची तातडीची मदत जाहीर केली होती. त्यानंतर केंद्र सरकारने साडेसहा हजार कोटींची मदत दिली. मदत करण्याची पहिली जबाबदारी राज्य सरकारची आहे. त्यानंतर केंद्राकडे मदत मागितली पाहिजे, असे ते म्हणाले. या वेळी पाटील यांनी महाविकास आघाडी सरकारवर टीका करताना अतिवृष्टी झाली, महापूर आला, वादळ आले की फक्त केंद्राकडे बोट दाखवायचे. स्वतः मात्र काही मदत करायची नाही, मग तुम्ही करणार काय, असा सवाल उपस्थित केला. मुख्यमंत्री उद्धव ठाकरे यांच्यावर निशाणा साधताना गेल्या वर्षी राष्ट्रपती राजवट लागू असताना उद्धव ठाकरे यांनी शेतकर्‍यांना 25 हजार हेक्टरी मदतीची मागणी केली होती. त्यामुळे आता मुख्यमंत्री असणारे ठाकरे यांनी ती मदत जाहीर करावी. कशाला पंचनामे करताय, असेही म्हटले.

…म्हणून मुख्यमंत्री घराबाहेर पडले

आम्ही वारंवार टीका केल्याने मुख्यमंत्री आता घराबाहेर पडत आहेत. याबद्दल त्याचे अभिनंदन, असा उपहासात्मक टोला चंद्रकांत पाटील यांनी या वेळी लगावला तसेच आपत्ती परिस्थितीत प्रत्यक्ष जागेवर जाऊन निर्णय घ्यावे लागतात, अशी टीकाही केली. राज्यात कोरोनाच्या परिस्थितीमध्ये केंद्र सरकारने मदत केली. गोरगरिबांना धान्यापासून, सिलिंडर, पैसे सर्व काही देण्यात आले. वैद्यकीय मदतही मोदी सरकारने केली, असे त्यांनी सांगितले. पंतप्रधान नरेंद्र मोदींकडे अतिवृष्टीबाबत मदत मागण्यासाठी जाण्याचे नियोजन मुख्यमंत्री उद्धव ठाकरे यांनी करावे. विरोधी पक्षनेते देवेंद्र फडणवीस जरूर जातील, असेही त्यांनी स्पष्ट केले.