नगर परिषद आपल्या दारी अभियान

उरण नगर परिषदेचा स्तुत्य उपक्रम

उरण ः वार्ताहर

उरण नगर परिषदेच्या वतीने नगर परिषद आपल्या दारी अभियान सुरू करण्यात आले आहे. मोरा येथे नगराध्यक्ष सायली म्हात्रे यांच्या हस्ते या अभियानाची सुरुवात झाली.

उरण नगर परिषदेने केलेल्या व करीत असलेल्या कामांची माहिती उरणच्या नागरिकांपर्यंत पोहचविणे व उरणच्या नागरिकांच्या सूचना, नागरी समस्या जाणून घेणे, लोकाभिमुख समस्यांचे निवारण करणे, नागरिकांशी संवाद साधणे हा या अभियानाचा मुख्य हेतू आहे. या उद्देशानेच उरण नगर परिषदेने नगर परिषद आपल्या दारी अभियान राबविले आहे. उरण नगर परिषदेतील एकूण नऊ प्रभागांत हा उपक्रम राबविण्यात आला. हे अभियान आमदार महेश बालदी यांच्या मार्गदर्शनाखाली आणि सहकार्याने राबविण्यात आले आहे.

या वेळी नगराध्यक्ष सायली म्हात्रे, उपनगराध्यक्ष जयविन कोळी, भाजप उरण तालुका अध्यक्ष रवी भोईर, शहर अध्यक्ष तथा नगरसेवक कौशिक शाह, नगरसेविका रजनी कोळी, जानव्ही पंडित, आशा शेलार, प्रियंका पाटील, नगरसेवक मेराज शेख, मोरा ग्रामस्थ आणि महिला आदी उपस्थित होते.