उलवे विद्यालयात विज्ञान प्रदर्शन उत्साहात

पनवेल : रामप्रहर वृत्त

रयत शिक्षण संस्थेच्या न्यू इंग्लिश स्कुल उलवे विद्यालयात सोमवारी (दि. 15) सेवा सहयोग फाऊंडेशन, मुंबई यांच्या सौजन्याने विज्ञान प्रदर्शन झाले. या संस्थेच्या सहकार्याने विद्यार्थ्यांना विज्ञान विषयातील विविध संकल्पना प्रात्यक्षिकाद्वारे स्पष्ट करून सांगण्यात आल्या. इयत्ता आठवी ते दहावीच्या विज्ञान अभ्यासक्रमावर आधारित विविध प्रात्यक्षिक दाखविण्यात आले. न्यूटनच्या गतिविषयक तिसर्‍या गुणधर्मावर आधारित कृती विद्यार्थ्यांकडून सादर करण्यात आली. आपत्कालीन परिस्थितीत आग कशी विझवावी याचे प्रात्यक्षिक करून दाखविण्यात आले. कार्यक्रमाच्या सुरुवातीला विद्यालयातील विज्ञान शिक्षक व्ही. जी. पाटील यांनी उपस्थिती मार्गदर्शक यांचे स्वागत केले तर प्रास्ताविक विद्यालयाचे मुख्याध्यापक एस. के. पाटील यांनी केले. विद्यालयाचे चेअरमन शरद खारकर यांच्या अध्यक्षतेखाली उद्घाटनाचा कार्यक्रम संपन्न झाला. या कार्यक्रमासाठी सेवा सहयोग फाऊंडेशनचे समन्वयक राजेश शेट्टी आणि मार्गदर्शक जयेश जोशी, जयश्री सानप, मोनिका माळी हे उपस्थित होते.तसेच सेवा सहयोगचे सुभाष बोवळेकर, समीर अन्नरकर, निनाद महाडिक आणि राकेश देसाई हे उपस्थित होते. चेअरमन शरद खारकर यांनी आपल्या अध्यक्षीय मनोगतातून सेवा सहयोग फाऊंडेशनचे विशेष कौतुक करून धन्यवाद दिले. समन्व्यक राजेश शेट्टी यांनी या कार्यक्रम आयोजनात सहकार्य केल्याबद्दल व्ही. जी. पाटील आणि मुख्याध्यापक एस. के. पाटील यांचे आभार मानले. कार्यक्रम सूत्रबद्ध यशस्वी होण्यासाठी विद्यालयातील शिक्षक एस. आर. गावंड, व्ही. व्ही. गावंड, एस. डी. पाटील, पी. व्ही. मुळे आदी शिक्षकांनी सहकार्य केले.