पंजाबचा राजस्थानवर निसटता विजय

रोमहर्षक सामन्यात संजू सॅमसनची शतकी झुंज व्यर्थ

मुंबई ः प्रतिनिधी

आयपीएलमध्ये अटीतटीच्या सामन्यात पंजाब किंग्जने राजस्थान रॉयल्सवर चार धावांनी निसटता विजय मिळविला. नाणेफेक गमावलेल्या पंजाबने प्रथम फलंदाजी करताना राजस्थानसमोर 20 षटकांत 6 बाद 221 धावांचा डोंगर उभारला होता. प्रत्युत्तरादाखल राजस्थानने 217 धावांपर्यंत मजल मारली. या सामन्यात राजस्थानचा कर्णधार संजू सॅमसनने धमाकेदार शतक झळकावले, मात्र त्यांची खेळी व्यर्थ ठरली. एका चेंडूत पाच धावा हव्या असताना तो झेलबाद झाला.

पंजाबच्या मोठ्या आव्हानाचा पाठलाग करण्यासाठी मैदानात उतरलेल्या राजस्थानची सुरुवात चांगली झाली नाही. मोहम्मद शमीच्या गोलंदाजीवर सलामीवीर बेन स्टोक्स शून्यावर माघारी परतला. तिसर्‍या षटकात एम. अश्विनने मनन वोहराचा सोपा झेल सोडला, मात्र या जीवदानाचा वोहराला फायदा करून घेता आला नाही. अर्शदीप सिंगच्या गोलंदाजीवर तो वैयक्तिक 12 धावांवर बाद झाला. वोहरा आणि स्टोक्स बाद झाल्यावर जोस बटलर आणि संजू सॅमसन यांनी राजस्थानचा डाव सांभाळला. या दोघांनी 45 धावांची भागीदारी रचली. वेगवान गोलंदाज रिचर्ड्सनने यॉर्कर टाकत बटलरला बाद केले. बटलरने 25 धावा केल्या. दुसर्‍या बाजूला सॅमसन संघाची धावगती वाढवत होता. बटलर बाद झाल्यानंतर मैदानात आलेला शिवम दुबे 23 धावांची खेळी करून बाद झाला. अर्शदीपने त्याला झेलबाद केले.

यानंतर रियान पराग आणि सॅमसन यांनी पंजाबच्या गोलंदाजांची धुलाई करण्यास सुरुवात केली. 11 चेंडूंत 25 धावा केलेल्या परागला मोहम्मद शमीने बाद करीत राजस्थानचे संकट वाढवले, पण एका बाजूने सॅमसनने आपली आक्रमकता कायम राखत 54 चेंडूंत शतक पूर्ण केले. दुसर्‍या बाजूला असलेल्या तेवतियाला मात्र मोठी खेळी करता आली नाही. मेरेडिथने त्याला यष्टीपाठी झेलबाद केले. शेवटच्या षटकात राजस्थानला विजयासाठी 13 धावांची गरज होती, मात्र या षटकात अर्शदीपने आठ धावा देत पंजाबच्या विजयावर शिक्कामोर्तब केले. एका चेंडूत पाच धावा असताना सॅमसन झेलबाद झाला. त्याने 63 चेंडूंत 12 चौकार आणि 7 षटकारांसह 119 धावांची खेळी केली. पंजाबकडून अर्शदीपने तीन तर, मोहम्मद शमीने दोन बळी घेतले.

तत्पूर्वी, पंजाब किंग्जकडून कर्णधार के. एल. राहुल आणि दीपक हुड्डा यांनी वादळी खेळी करीत संघाला दोनशेपार पोहोचवले. राहुलने चौफर फटकेबाजी केली. डावाच्या शेवटच्या षटकात लोकेश तो बाद झाला.

सीमारेषेवर राहुल तेवतियाने चपळाई दाखवत राहुलचा झेल टिपला. राहुलने 50 चेंडूंत पाच षटकार आणि सात चौकरांसह 91 धावांची खेळी केली. हुड्डाने त्याला तोलामोलाची साथ देत 28 चेंडूंत चार चौकार आणि सहा षटकारांसह 64 धावांची खेळी केली, तर ख्रिस गेलने 28 चेंडूंत चार चौकार आणि दोन षटकारांसह 40 धावा केल्या. राजस्थानकडून चेतन साकारियाने तीन आणि ख्रिस मॉरिसने दोन बळी घेतले.