पेण दादर येथे विठ्ठल-रखुमाई उत्सव साध्या पद्धतीने साजरा

पेण ः प्रतिनिधी

पेण तालुक्यातील दादर गावात विठ्ठल-रखुमाईचा उत्सव गेल्या वर्षीप्रमाणे या वर्षीही कोरोनाचे संकट असल्याने साध्या पद्धतीने साजरा करण्यात आला. कोरोनाचा प्रादुर्भाव वाढत असल्याने शासकीय नियमांचे पालन करून विठ्ठल-रखुमाईचा उत्सव मोजक्याच भाविक भक्तांच्या उपस्थितीत साजरा करण्यात आला. कोणताही कार्यक्रम ठेवण्यात आला नाही. या वेळी भाविकांना सुंठवडा, खिचडी व केळीचा प्रसाद देण्यात आला.

या वेळी निकिता ठाकूर यांनी गेल्या वर्षी बोललेला नवस या वर्षी कु. आरव राकेश ठाकूर याची तुला फळा-फुलांनी करून विठ्ठल-रखुमाई मंदिरात पूर्ण केला. या वेळी विठ्ठल-रखुमाई मंडळाचे सदस्य हभप बाबूराव पाटील यांचे काही दिवसांपूर्वीच निधन झाल्याने त्यांना भावपूर्ण श्रद्धांजली वाहण्यात आली.