कर्जत, खोपोलीतही पाणी शिरले; नेरळजवळ दोघे वाहून गेले

कर्जत, खोपोली, खालापूर ः प्रतिनिधी
जोरदार पावसामुळे कर्जत आणि खोपोलीत पाणी शिरले होते. नेरळजवळील दामत येथे पुलाजवळ माय-लेक वाहून गेले आहेत.
ढगफुटीसदृश पाऊस पडल्याने कर्जत तालुका जलमय झाल्याचे दिसून आले. शहरातील अनेक भागांत आणि उल्हास नदीच्या तीरावर असलेल्या गावांत पुराचे पाणी शिरले होते. कर्जत-कल्याण राज्यमार्गावर दामत येथे इब्राहिम मुनियार (वय 46) आणि झोया इब्राहिम मुनियार (वय 6) हे दोघे माय-लेक गुरुवारी रात्री 2च्या सुमारास पुराच्या पाण्यात वाहून गेले.
खोपोली शहरातही अनेक सखल भागांत पाणी साचले होते. रेल्वेरूळाखालील मातीचा भराव वाहून गेल्याने खोपोली-कर्जत रेल्वेसेवा ठप्प झाली आहे. रस्ते वाहतुकीवरही पावसाचा परिणाम जाणवला.