मुंबै बँकेच्या बदनामीविरोधात एक हजार कोटींचा अब्रुनुकसानीचा दावा दाखल -आ. दरेकर

मुंबई : प्रतिनिधी

मुंबै जिल्हा मध्यवर्ती बँक ही राज्यातील प्रगत आणि उत्तम बँक आहे. कारण मुंबै बँक आम्ही 1200 कोटींच्या टप्प्यावरून 10 हजार कोटींवर मेहनतीने आणली. मुंबईच्या सहकाराचे हे वैभव आहे. या लौकिकास काळीमा फासण्याचे काम दुर्दैवाने काही जणांकडून झाले आहे. त्यामुळे बँकेच्या संदर्भात कोणीही उठसूट वाटेल ते स्टेटमेंट देईल, हे अयोग्य असल्यामुळे बँकेने कालच मुंबई उच्च न्यायालयात एक हजार कोटींचा अब्रुनुकसानीचा दावा दाखल केला आहे, अशी माहिती विधान परिषदेचे विरोधी पक्षनेते व मुंबै जिल्हा मध्यवर्ती बँकेचे अध्यक्ष प्रविण दरेकर यांनी आज दिली.

प्रसिद्धीमाध्यमांशी बोलताना दरेकर यांनी सांगितले की, मुंबई जिल्हा मध्यवर्ती बँकेला इथपर्यंत आणण्यात अनेक माजी अध्यक्ष, संचालक आदींचे योगदान आहे. मुंबईच्या सहकाराचे हे वैभव आहे. पण बँकेला काळिमा फासण्याचे काम सर्व टप्प्यावर होत आहे. आमची राजकीय बदनामी करा, वैयक्तिक बदनामी करा परंतु एका आर्थिक संस्थेची बदनामी झाल्याचा परिणाम त्यांचे ग्राहक, डिपॉझिटर्स यांच्यावर होतो. या बँकेवर हजारो लोकांचे पोट अवलंबून असते.

एखाद्या बातमीने किंवा एखाद्या स्टेटमेंटने बँक अडचणीत आली, तर त्याची जबाबदारी कोण घेणार? म्हणून आम्ही मुंबई बँकेच्या बदनामी करणार्‍यांच्या विरोधात उच्च न्यायालयात सूट नंबर 21909 आणि सूट नंबर 21935 या नोंदणी क्रमांकप्रमाणे दावा दाखल केला आहे. बँकेची नाहक बदनामी करणार्‍यांच्या विरोधात कारवाई करण्याची मागणी आम्ही न्यायालयात केल्याची माहिती दरेकर यांनी यावेळी दिली. आम्ही सव्वा रुपया वगैरेचा नाही तर एक हजार कोटीचा दावा दाखल केला आहे, असा टोलाही दरेकर यांनी या वेळी लगावला.