लोकनेते रामशेठ ठाकूर व कुटुंबीयांचा रयत शिक्षण संस्थेच्या वतीने हृद्य गौरव

सातारा ः रामप्रहर वृत्त
कर्तृत्व, दातृत्व आणि समाजकारणाला महत्त्व देत सामाजिक जाणीव व बांधिलकी जोपासणारे रयत शिक्षण संस्थेच्या मॅनेजिंग कौन्सिलचे सदस्य, माजी खासदार थोर देणगीदार लोकनेते रामशेठ ठाकूर व त्यांच्या कुटुंबीयांनी या संस्थेला तब्बल आठ कोटी 86 लाख रुपयांची देणगी दिली. त्याबद्दल त्यांचा संस्थेच्या वतीने अध्यक्ष खासदार शरद पवार यांच्या हस्ते मंगळवारी (दि. 9) सातारा येथे कर्मवीर भूमीत समारंभपूर्वक हृद्य गौरव करण्यात आला.
रयत शिक्षण संस्थेचे संस्थापक पदमभूषण कर्मवीर भाऊराव पाटील यांचा 64वा पुण्यतिथी सोहळा सातारा येथे अनेक मान्यवर व हजारो रयत सेवकांच्या उपस्थितीत झाला. थोर देणगीदार लोकनेते रामशेठ ठाकूर व कुटुंबीयांनी रयत शिक्षण संस्थेच्या विकासासाठी सातत्याने भरीव मदत करून या संस्थेच्या प्रगतीसाठी नेहमीच मोलाचा हातभार लावला आहे. रयत ही मातृसंस्था माणून सदैव रयतेच्या विकासासाठी कार्य करणारे लोकनेते रामशेठ ठाकूर यांनी याही वर्षी शैक्षणिक वर्षात सहा कोटी 75 लाख रुपये, त्यांच्या पत्नी शकुंतला ठाकूर यांनी 80 लाख रुपये, ठाकूर इन्फ्राप्रोजेक्ट्सच्या माध्यमातून सुपुत्र आमदार प्रशांत ठाकूर यांनी 81 लाख रुपये, तर दुसरे सुपुत्र परेश ठाकूर यांनी 50 लाख रुपयांची देणगी देऊन रयत शिक्षण संस्थेच्या विकासात नेहमीप्रमाणे मोलाचा वाटा उचलला. त्याबद्दल या सर्व थोर देणगीदारांचा संस्थेच्या दृष्टिकोनातून अत्यंत महत्त्वाचा समजल्या जाणार्‍या या कार्यक्रमात हृद्य सत्कार करण्यात आला.
सामाजिक भावनेतून लोकनेते रामशेठ ठाकूर व कुटुंबीय कार्य करीत असतात. रयत शिक्षण संस्था आणि ठाकूर कुटुंबीय यांचे जिव्हाळ्याचे नाते आहे. तळागाळातील विद्यार्थ्यांपर्यंत शिक्षण पोहचावे यासाठी कर्मवीर अण्णांनी केलेले कार्य पुढे नेण्याचे काम रयतसेवक म्हणून लोकनेते रामशेठ ठाकूर करीत आहेत. या अनुषंगाने संस्थेचे अध्यक्ष शरद पवार यांनी व्यासपीठावरून बोलताना लोकनेते रामशेठ ठाकूर आणि त्यांच्या कुटुंबीयांचे कौतुक केले तसेच आजपर्यत संस्थेला लोकनेते रामशेठ ठाकूर यांनी जवळपास 100 कोटी रुपयांची देणगी दिल्याचे जाहीर केले. त्याचबरोबर त्यांचे योगदान सर्वांना ऊर्जा देणारे असल्याची भावना विषद करीत आदर व्यक्त केला. या वेळी सर्व उपस्थितांनी लोकनेते रामशेठ ठाकूर व कुटुंबीयांचे टाळ्यांच्या गजरात आभार मानले.
या सोहळ्यास प्रमुख मान्यवर म्हणून संस्थेचे चेअरमन डॉ. अनिल पाटील, व्हॉईस चेअरमन भगीरथ शिंदे, विधानसभेचे विरोधी पक्षनेते अजित पवार, आमदार दिलीप वळसे-पाटील, खासदार श्रीनिवास पाटील, आमदार विश्वजित कदम, चेतन तुपे, आशुतोष काळे, बाळासाहेब पाटील, मकरंद पाटील, अरुण लाड, शशिकांत शिंदे, निलेश लंके, संस्थेचे सचिव विठ्ठल शिवणकर, माई पाटील आदी मान्यवर व्यासपीठावर उपस्थित होते. त्याचप्रमाणे संस्थेचे जनरल बॉडी सदस्य अरुणशेठ भगत, वाय. टी. देशमुख, महेंद्र घरत, अमोघ ठाकूर, अपूर्व ठाकूर, सचिन पाटील, सुरेश पाटील, सुधीर घरत, विश्वनाथ कोळी यांच्यासह संस्थेचे अनेक पदाधिकारी आणि हजारोच्या संख्येने रयत सेवक उपस्थित होते.

काही व्यक्ती अशा असतात, ज्या इतरांचे भले व्हावे यासाठी झटतात. त्यांची दूरदृष्टी समाजाला अत्यंत भरीव असे योगदान देते. कर्मवीर भाऊराव पाटील हेही अशाच थोर व्यक्तींपैकी एक. ग्रामीण भागातील विद्यार्थ्यांसाठी त्यांनी लावलेला शिक्षणाचा ज्ञानदीप आजही तेवत आहे. श्रम, स्वावलंबन आणि समता या तीन तत्वांवर कर्मवीरांनी रयत शिक्षण संस्थेची स्थापना केली. आज रयत शिक्षण संस्था उच्च दर्जाची संस्था म्हणून नावारूपास आली आहे. संस्था नुसती वाढत नसून शिक्षणाच्या गुणवत्तेतही वाढ होत आहे. जगातील विविध नामांकित संस्थांशी आपली संस्था जोडली गेली आहे. संस्थेचा विस्तार वाढतोय त्यामुळे व्यवस्थापन गतीने करण्याच्या दृष्टिकोनातून दिशा देण्याचे काम केले जाईल.
-शरद पवार, अध्यक्ष, रयत शिक्षण संस्था