आयुष्य घडविण्यासाठी संकल्प महत्त्वाचा -माजी सनदी अधिकारी अविनाश धर्माधिकारी

भव्य रोजगार मेळाव्यात 1828 उमेदवारांनी घेतला सहभाग

पनवेल ः रामप्रहर वृत्त
आयुष्य घडविण्यासाठी संकल्प महत्त्वपूर्ण असतो. त्यामुळे स्वतःची ओळख, आवडते क्षेत्र आणि उत्तम व प्रतिभावंत होणे ही त्रिसूत्री अंगिकारा, अशी मार्गदर्शक सूचना माजी सनदी अधिकारी अविनाश धर्माधिकारी यांनी शनिवारी (दि. 3) खांदा कॉलनी येथे झालेल्या कार्यक्रमात विद्यार्थ्यांना केली.
लोकप्रिय आमदार प्रशांत ठाकूर यांच्या 50व्या वाढदिवसानिमित्त चांगू काना ठाकूर उच्च महाविद्यालय (स्वायत्त) आणि सी.डी. देशमुख स्पर्धा परीक्षा मार्गदर्शन केंद्र यांच्या संयुक्त विद्यमाने भारतीय प्रशासकीय सेवेतील माजी अधिकारी अविनाश धर्माधिकारी यांचे इयत्ता दहावी व बारावीच्या विद्यार्थ्यांना करिअरच्या संधी आणि व्यक्तिमत्व विकास या विषयावर मार्गदर्शन सत्र व विद्यार्थी संवाद कार्यक्रम त्याचबरोबर पाचवी ते पदवीधर असलेल्या उमेदवारांना रोजगाराच्या दृष्टिकोनातून भव्य रोजगार मेळावा माजी खासदार लोकनेते रामशेठ ठाकूर यांच्या अध्यक्षतेखाली खांदा कॉलनीमधील चांगू काना ठाकूर उच्च महाविद्यालयात झाला. त्या वेळी विद्यार्थ्यांना मार्गदर्शन करताना धर्माधिकारी बोलत होते.
या कार्यक्रमांना प्रमुख मान्यवर म्हणून आमदार प्रशांत ठाकूर, आमदार महेश बालदी, जनार्दन भगत शिक्षण प्रसारक संस्थेचे अध्यक्ष अरुणशेठ भगत, व्हाईस चेअरमन वाय.टी. देशमुख, भाजपचे उत्तर रायगड जिल्हाध्यक्ष अविनाश कोळी, महापालिकेचे माजी सभागृहनेते परेश ठाकूर, जनार्दन भगत शिक्षण प्रसारक संस्थेचे सचिव डॉ. एस.टी. गडदे, कार्यकारिणी सदस्य अनिल भगत, संजय भगत, भाजपचे जिल्हा सरचिटणीस नितीन पाटील, प्राचार्य एस.के. पाटील, भाजपचे तालुका उपाध्यक्ष संजय पाटील, सरचिटणीस राजेंद्र पाटील, भूपेंद्र पाटील, माजी उपमहापौर चारुशीला घरत, माजी नगरसेवक एकनाथ गायकवाड, मनोहर म्हात्रे, विकास घरत, प्रवीण पाटील, विजय चिपळेकर, भाजप अनुसूचित सेल जिल्हाध्यक्ष अमित जाधव, महिला मोर्चाच्या शहराध्यक्ष राजेश्री वावेकर, कामगार नेते जितेंद्र घरत, ओबीसी सेलचे जिल्हाध्यक्ष राजेश गायकर, अ‍ॅड. चेतन जाधव, प्रदीप भगत, युवा मोर्चाचे जिल्हाध्यक्ष मयुरेश नेतकर, तालुकाध्यक्ष आनंद ढवळे आदी उपस्थित होते.
अविनाश धर्माधिकारी यांनी पुढे बोलताना सांगितले की, नमस्कार आणि सर्वांना सर्वकाळ सर्व शुभेच्छा हे जीवनातील दोन मंत्र आहेत. समोरच्या व्यक्तीला नमस्कार केल्याने आपल्यात आणि त्या व्यक्तीमध्ये ईश्वरी चैतन्य निर्माण होते, तर दुसर्‍या मंत्रामुळे सर्व विश्वाचे कल्याण करण्याची शक्ती मिळते. सर्व विश्वाचे कल्याण करणारी आपली भारतीय संस्कृती आहे आणि जगाला कल्याणाची शिकवण आपल्या देशाने दिली आहे. संकल्प आपल्या आयुष्याला आकार देण्याचे काम करतो. आपण जसे व्यक्तिमत्व घडवू तसा जीवनाला आकार येतो. माणूस म्हणून आपल्याला सन्मानाने जगता आले पाहिजे आणि त्यासाठीही संकल्प महत्त्वाचा असतो. सर्व करिअर चांगले आणि समान असतात. फक्त त्याची निवड आपल्या बौद्धिक क्षमतेनुसार करणेही तेवढेच गरजेचे असते आणि हे करताना बदलता काळही लक्षात घेतला पाहिजे.
शिक्षणातून करिअर करताना भारतमातेची सेवा झाली पाहिजे हेही आपल्या मनात रूजले पाहिजे आणि त्या अनुषंगाने केलेली वाटचाल मार्गदर्शक ठरणार आहे. जगात दिवसेंदिवस बदल घडत आहे आणि पुढील सहा वर्षात एआय विज्ञान क्षेत्रामुळे प्रचंड बदल व तसा त्याचा परिणाम होणार आहे. एआयमुळे रोजगार कमी होणार असले तरी त्या क्षेत्रातील रोजगारांची निर्मितीही मोठ्या प्रमाणात होणार आहे. त्यामुळे त्याचाही वेध घेत त्यामध्येही करिअरची संधी असल्याचे धर्माधिकारी यांनी सांगितले. तंत्रज्ञान बदलेल, संधी बदलतील, मात्र स्पर्धा परीक्षा कायम राहतील. त्यामुळे विद्यार्थ्यांनी या क्षेत्रात करिअर करावे, असे आवाहनही त्यांनी करत सीकेटी महाविद्यालयातील स्पर्धा परीक्षा मार्गदर्शन केंद्राला आवश्यक ते सहकार्य करणार असल्याची ग्वाही दिली.
अध्यक्षीय भाषणात लोकनेते रामशेठ ठाकूर यांनी म्हटले की, आपला देश विविध संस्कृतींनी नटलेला आहे आणि या देशाचा सुजाण नागरिक होणे ही सर्वांची जबाबदारी आहे. आजचा विद्यार्थी उद्याचा बलाढ्य भारत आहे. त्यामुळे प्रत्येक तरुणाने त्याची जाणीव ठेवून मार्गक्रमण केले पाहिजे. विज्ञान पुढे जात आहे आणि त्यानुसार काळ बदलत आहे. त्यामुळे आपण निवडलेले क्षेत्र हे जीवनाला दिशा देणारे असले पाहिजे. त्यासाठी मेहनत घ्या आणि कुटुंबासोबत देशही महत्त्वाचा आहे, त्या अनुषंगाने अविनाश धर्मधिकारी यांनी आपल्या अमूल्य मार्गदर्शनातून दिलेल्या सूचना आत्मसात करा, असे आवाहनही त्यांनी केले.
आमदार प्रशांत ठाकूर यांनी, अटल सेतू, आंतरराष्ट्रीय विमानतळ, जेएनपीएमुळे आगामी पाच वर्षाच्या काळात या परिसरात जगातील विविध प्रकल्प येणार आहेत तसेच या ठिकाणी असलेल्या अनेक विद्यापीठातून विविध शैक्षणिक कोर्सेस उपलब्ध आहेत. त्या अनुषंगाने आजच्या विद्यार्थ्यांना संधींचे द्वार उपलब्ध होणार आहे. त्यानुसार परिसरात येणार्‍या संधींचे सोने करण्यासाठी विद्यार्थांनी आपली शैक्षणिक गुणवत्ता वाढवावी, असे आवाहन केले.
पाहुण्यांचे स्वागत व प्रास्ताविक प्राचार्य डॉ. एस.के. पाटील यांनी केले, तर उपस्थितांचे आभार स्पर्धा परीक्षा केंद्राचे प्रमुख जे.एम. पावरा यांनी केले.

पात्र उमेदवारांना ऑन दि स्पॉट अपॉईंटमेंट लेटर

युवकांच्या समस्यांची जाण असलेले कार्यसम्राट आमदार प्रशांत ठाकूर यांच्या संकल्पनेतून व मार्गदर्शनाखाली झालेल्या भव्य रोजगार मेळाव्यामध्ये 1828 उमेदवारांनी सहभाग घेतला होता. या अनुषंगाने विविध क्षेत्रातील रिलायन्स, एसबीआय लाईफ इन्शुरन्स, टाटा स्ट्राईव्ह, गुगल पे, आदित्य बिर्ला, आयसीआयसीआय बँक, ओला, युरेका फॉर्ब्स, एलआयसी, फोन पे, डॉ. रेड्डी फाऊंडेशन, जिओ अशा नामांकित 60 कंपन्यांमध्ये रोजगार उपलब्ध करून देण्यात आले होते. या वेळी काही पात्र उमेदवारांना ऑन दि स्पॉट अपॉईंटमेंट लेटर लोकनेते रामशेठ ठाकूर, ज्येष्ठ नेते वाय.टी. देशमुख, भाजपचे जिल्हाध्यक्ष अविनाश कोळी, प्राचार्य एस.के. पाटील यांच्या हस्ते प्रदान करण्यात आले.