रामबागचा वर्धापन दिन उत्साहात साजरा; मान्यवरांची उपस्थिती

पनवेल : रामप्रहर वृत्त
महाराष्ट्राच्या सौंदर्यात भर टाकणार्‍या आणि लाखो निसर्गप्रेमींनी भेट दिलेल्या पनवेल तालुक्यातील न्हावेखाडी येथील रामबाग या अतिसुंदर उद्यानाचा द्वितीय वर्धापन दिन सोहळा हजारो नागरिकांच्या साक्षीने रविवारी (दि. 22) सायंकाळी मोठ्या उत्साहात साजरा झाला.
नयनरम्य वातावरण, आकर्षक विद्युत रोषणाई, उत्तम नियोजन आणि लहानग्यांपासून युवक, महिला, ज्येष्ठांच्या उपस्थितीने रामबाग नंदनवनाप्रमाणे फुलली होती. अशा वेळी पारंपरिक आगरी-कोळीगीतांच्या बहारदार कार्यक्रमाने वातावरणात स्फूर्ती आणली. स्वतःच्या संपत्तीतून लोकांच्या सेवेसाठी उभारलेली रामबाग ही वास्तू न्हावे पंचक्रोशीतच नव्हे; तर पनवेल, उरण, रायगड नवी मुंबईसाठी अभिमानाची ठरली आहे. विशेष म्हणजे रामबाग आता पर्यटनस्थळ म्हणून उदयास आली आहे. त्यामुळे न्हावे व पंचक्रोशीतील ग्रामस्थ आणि म्हसेश्वर मंदिर समितीच्या वतीने लोकनेते रामशेठ ठाकूर यांचा हृदय सत्कार करून त्यांच्याप्रती आदर व्यक्त करण्यात आला. त्याचप्रमाणे विधानसभा निवडणुकीत विजयी चौकार मारणारे आमदार प्रशांत ठाकूर आणि पुन्हा एकदा विजयी मिळवलेले आमदार महेश बालदी यांचा नागरी सत्कार करण्यात आला.
या सोहळ्यात प्रमुख मान्यवर म्हणून कोकण म्हाडाचे माजी सभापती बाळासाहेब पाटील, काँग्रेसचे जिल्हाध्यक्ष महेंद्र घरत, भाजपचे उत्तर रायगड जिल्हाध्यक्ष अविनाश कोळी, ज्येष्ठ नेते वाय.टी. देशमुख, प्रकल्पग्रस्तांचे नेते स्व. दि.बा. पाटील यांचे पुत्र अतुल पाटील, माजी जिल्हा परिषद सदस्य रवींद्र पाटील, टीआयपीएलचे संचालक अमोघ ठाकूर, सरपंच विजेंद्र पाटील आदी व्यासपीठावर उपस्थित होते.
वर्धापन दिनानिमित्त आयोजित करण्यात आलेल्या श्री सत्यनारायण महापूजेचे हजारो नागरिकांनी दर्शन तसेच महाप्रसादाचा लाभ घेतला. या वेळी पंचम निर्मित व गणेश भगत प्रस्तुत सुप्रसिद्ध अभिनेते पंढरीनाथ अर्थात पॅडी कांबळे आणि सोबत 70 कलाकारांचा संच असलेला ’महाराष्ट्राचे आम्ही मराठी’ या पारंपरिक लोकगीते व कोळीगीतांच्या बहारदार कार्यक्रमाने रंगत आणली.
रामबागला भेट देणार्‍यांना मनोमन समाधान आणि त्यांच्या चेहर्‍यावर मनमुराद आनंद दिसतो. न्हावेखाडीत रामबागच्या रूपाने कमळ उमलले आणि याचा उपयोग संपूर्ण परिसराला होत असून त्यामुळे या परिसराला आणखी एक चांगली ओळख मिळाली. राज्यातून विविध भागातील लोकं या ठिकाणी आवर्जून भेट देत आहेत. अनेक उद्यानांना प्रवेश फी आकारली जाते, मात्र रामबागेत प्रवेश विनाशुल्क आहे. या ठिकाणी प्रवेश मोफत असला तरी सुविधा दर्जेदार आहेत. लोकनेते रामशेठ ठाकूर यांच्या संकल्पनेतून महाराष्ट्राच्या नावलौकिकात भर टाकणारी अशी स्वर्गसुखाचा आनंद देणारी म्हणून रामबाग ओळखली जात आहे.
वर्धापन दिन सोहळ्याला लोकनेते रामशेठ ठाकूर यांच्या सुविद्य पत्नी शकुंतला ठाकूर, वर्षा प्रशांत ठाकूर, माझगाव डॉकचे जीएम श्री. सांळुखे, माजी सरपंच हरिश्चंद्र म्हात्रे, चिंतामण घरत, रामदास ठाकूर, न्हावे उपसरपंच शैलेश पाटील, गव्हाण उपसरपंच विजय घरत, जयवंत देशमुख, विश्वनाथ कोळी, खारघर अध्यक्ष प्रवीण पाटील, कळंबोली अध्यक्ष रविनाथ पाटील, जिल्हा चिटणीस चंद्रकांत घरत, माजी उपमहापौर चारुशीला घरत, माजी नगरसेवक अजय बहिरा, तेजस कांडपिळे, प्रभाकर बहिरा, माजी नगरसेविका सुशीला घरत, दर्शना भोईर, प्रमिला पाटील, कल्पना ठाकूर, माजी पंचायत समिती सदस्य रत्नप्रभा घरत, मदन ठाकूर, हरेश्वर कडू, प्रकाश कडू, अरुणशेठ ठाकूर, वैभव म्हात्रे, अमर म्हात्रे, ग्रामपंचायत सदस्य यांच्यासह ठाकूर कुटुंबिय, स्थानिक स्वराज्य संस्थेचे लोकप्रतिनिधी, पदाधिकारी व नागरिक मोठ्या संख्येने उपस्थित होते.
उपस्थित मान्यवरांचे श्री म्हसेश्वर मंदिर कमिटीचे अध्यक्ष सी.एल. ठाकूर, रामबाग व्यवस्थापन कमिटीचे अध्यक्ष सागर ठाकूर व पदाधिकार्‍यांनी स्वागत केले. या वेळी स्वप्नील ठाकूर यांनी स्वागतपर भाषणात रामबाग निर्मितीमागचे उद्दिष्ट विषद केले. हे उद्यान न्हावे पंचक्रोशीच्या दृष्टिकोनातून महत्त्वपूर्ण, अभिमानास्पद व पर्यावरणप्रेमी स्थळ असल्याचे त्यांनी अधोरेखित केले.
परिसरात अपेक्षित विकास घडवण्यासाठी काम करत राहू – आमदार प्रशांत ठाकूर
आपल्या सर्वांचे मार्गदर्शक लोकनेते रामशेठ ठाकूरसाहेबांच्या मार्गदर्शनाखाली म्हसेश्वर देवस्थान कमिटीच्या माध्यमातून हा सगळा परिसर सुशोभित झाला. न्हावेखाडी गावाच्या विकासाच्या दृष्टिकोनातून रामबाग हे आपल्या सर्वांना अभिमान वाटणारे अशा पद्धतीचे एक सौंदर्यस्थळ, पर्यटनस्थळ ठरलेले आहे, असे उद्गार आमदार प्रशांत ठाकूर यांनी या वेळी काढले. आज राज्याचे मुख्यमंत्री देवेंद्र फडणवीस यांच्या नेतृत्वाखाली महाराष्ट्र प्रचंड वेगाने बदलतोय. आपला परिसरसुद्धा बदलत असताना त्या परिसरामध्ये आपल्याला अपेक्षित विकास घडवण्यासाठी आम्ही काम करत राहू, अशी ग्वाहीदेखील त्यांनी दिली.
लोकनेते रामशेठ ठाकूरसाहेबांच्या नेतृत्वाखाली या ठिकाणी कमिटीच्या सर्व सदस्यांनी, ग्रामस्थांनी दिलेल्या योगदानाबद्दल आमदार प्रशांत ठाकूर यांनी त्यांचे मनापासून अभिनंदन व आभार व्यक्त करून म्हटले की, आज या आपल्या सर्वांच्या जिव्हाळ्याच्या बनलेल्या रामबाग परिसराला पाहता पाहता दोन वर्ष झाली आहेत आणि त्या माध्यमातून आपण सगळेच जण एकमेकांशी अधिकाधिक जोडले जातोय. या ठिकाणी होणारे वेगवेगळ्या पद्धतीचे सांस्कृतिक कार्यक्रम हीसुद्धा आता रामबागची एक खासन वेगळी अशी ओळख बनत चाललेली आहे. त्यामुळे हा परिसर आपल्या उलवेचीच नाही तर एका अर्थाने पनवेल तालुक्याची शान बनत चाललेला आहे आणि त्यामुळे निश्चितच आपल्या सगळ्यांचा आनंद हा अधिकाधिक वाढला आहे.
वेगवेगळ्या मार्गाने या परिसराच्या विकासासाठी कै. जनार्दन भगतसाहेब यांच्यापासून प्रेरणा घेत लोकनेते रामशेठ ठाकूरसाहेबांच्या नेतृत्वाखाली आपण सारी मंडळी काम करतो. स्थानिक ग्रामस्थ, शेतकरी यांना अभिमानाने इथं आपले जीवन जगता आले पाहिजे. पुढच्या पिढीला त्यांना चांगल्या पद्धतीने इथे विकासाचा होतोय व त्या विकासामध्ये महत्त्वाचं स्थान मिळालं पाहिजे यासाठी जे जे करण आवश्यक आहे ते करण्यासाठी रामशेठ ठाकूरसाहेबांच्या नेतृत्वाखाली आपण प्रयत्न करतो. मग इथे विमानतळ येतंय, जेएनपीटीचे चार चार पोर्टस् आलेले आहेत किंवा या परिसराचा होणारा हा जो विकास आहे यामध्ये विकासाच्या, रोजगाराच्या-स्वयंरोजगाराच्या अनेक संधी नव्याने निर्माण होतात आणि या नव्याने निर्माण होणार्‍या या संधी आपल्या तरुणांना मिळाल्या पाहिजेत. आपल्या परिसरात राहणारा ग्रामस्थ, नवयुवक यांना कुठल्याही स्थितीमध्ये रोजगारासाठी इथून कुठे जावे लागू नये. देशभरातून वेगवेगळे तरुण आपले नशीब आजमावण्यासाठी मुंबई, नवी मुंबईत येतात, आपल्या परिसरात येऊन स्थायिक होत आहेत. देशभरातून जेव्हा लोक इथे येतात आणि या ठिकाणी आपलं कर्तृत्व गाजवण्याचा प्रयत्न करताहेत तेव्हा इथल्या स्थानिकांनासुद्धा आपलं कर्तृत्व इथं गाजवता आलं पाहिजे यासाठी त्याला संधी निर्माण करणे हे राजकीय, सामाजिक क्षेत्रात काम करणार्‍या आम्हा सर्वांची जबाबदारी आहे. याचबरोबर त्याला चांगले शिक्षण मिळाले पाहिजे यासाठी शिक्षणाच्या चांगल्या संधी या परिसरात निर्माण करणे हीसुद्धा शैक्षणिक, सामाजिक, राजकीय क्षेत्रातल्या सर्व पदाधिकारी, कार्यकर्त्यांची जबाबदारी आहे आणि म्हणून रामशेठ ठाकूरसाहेबांच्या नेतृत्वाखाली आज या परिसरामध्ये काम करत असताना ज्या व्यासपीठावरदेखील आपण राजकीय अभिनिवेश बाजूला ठेवून सर्वजण जेव्हा एकत्र येतो तेव्हा या परिसराचा विकास हाच ध्यास आपण मनापुढे ठेवून डोळ्यापुढे ठेवून काम करत राहिलेलो आहोत आणि याच दृष्टिकोनातून आमदार म्हणून मी, आमदार महेश बालदी व आमदार विक्रांत पाटील आम्हां तिघांची ही जी जबाबदारी आहे ती लोकनेते रामशेठ ठाकूरसाहेबांच्या नेतृत्वाखाली आम्ही सातत्याने पार पडत राहू अशी ग्वाही या सत्काराच्या निमित्ताने देत आहे, असे आमदार प्रशांत ठाकूर म्हणाले.
आपण सर्वांच्या उपस्थितीमध्ये आमचा जो सत्कार झाला त्या सत्काराचे उतराई होऊ शकत नाही, पण त्या सत्काराला या परिसरासाठी अधिकाधिक काम करून उत्तर देत राहू असे वचन या निमित्ताने आपणा सर्वांच्या समोर या ठिकाणी देतो. पुन्हा एकदा आपणा सर्वांचे या ठिकाणी आभार व्यक्त करत असताना ज्यांनी निवडून दिले त्या सर्वसामान्य जनतेला त्याबद्दल मनापासून धन्यवाद देऊन जनतेच्या हितासाठी सातत्याने काम करत राहू, असेही आमदार प्रशांत ठाकूर यांनी नमूद केले.