म्युनिसिपल एम्प्लॉईज युनियनची बैठक यशस्वी; बेमुदत उपोषण तूर्त स्थगित!

आमदार प्रशांत ठाकूर व आयुक्त मंगेश चितळे यांच्या पुढाकाराने पनवेल मनपा कामगारांना मोठा दिलासा

पनवेल : रामप्रहर वृत्त
पनवेलचे कार्यसम्राट व लोकप्रिय आमदार प्रशांत ठाकूर यांच्या यशस्वी मध्यस्थीमुळे आणि महानगरपालिका आयुक्त मंगेश चितळे यांच्या नेतृत्वाखाली झालेल्या चर्चेत महापालिका कामगारांच्या मागण्यांवर सकारात्मक तोडगा काढण्यात आला आहे. त्यामुळे 18 फेब्रुवारीपासून म्युनिसिपल एम्प्लॉईज युनियनने पुकारलेले बेमुदत उपोषण तूर्त स्थगित करण्यात आले आहे, अशी माहिती युनियनचे सरचिटणीस अनिल जाधव यांनी दिली.
महापालिकेतील कामगारांच्या संदर्भात युनियनने पालिकेकडे मागण्या सादर केल्या होत्या व त्या अनुषंगाने चर्चेची अपेक्षा व्यक्त केली, परंतु चर्चा न झाल्याने म्युनिसिपल एम्प्लॉईज युनियनचे अध्यक्ष अ‍ॅड. सुरेश ठाकूर, कार्याध्यक्ष संतोष पवार, सरचिटणीस अनिल जाधव यांच्या नेतृत्वाखाली कामगारांनी 18 फेबुवारीपासून पनवेल महापालिका कार्यालयासमोर बेमुदत उपोषणाची हाक दिली होती. या संदर्भात महापालिका प्रशासनाच्या वतीने अतिरिक्त आयुक्त कैलास गावडे यांनी 15 फेब्रुवारीला चर्चा केली होती.
दरम्यान, कामगारांच्या हिताच्या दृष्टिकोनातून आमदार प्रशांत ठाकूर यांनी विशेष लक्ष देत आयुक्त मंगेश चितळे यांच्याशी संवाद साधत कामगारांच्या मागण्यांसंदर्भात सकारात्मक कार्यवाहीची सूचना केली होती. त्यानुसार 17 फेब्रुवारीला आयुक्त मंगेश चितळे यांच्या अध्यक्षतेखाली सविस्तर बैठक घेण्यात आली.
या बैठकीत कामगारांच्या प्रश्नांवर चांगल्या प्रकारे चर्चा होऊन चर्चेनंतर कामगार हिताचे निर्णय घेण्यात आले. त्यात प्रामुख्याने पेशन्स योजना, वारस व अनुकंपा प्रकरणे, सेवाज्येष्ठतेप्रमाणे नव्याने एकच यादी प्रसिद्ध करून जेष्ठतेनुसार पदोन्नती, गणवेश वाटप व पावसाळी प्रावरणे वेळेत देणे, कामगार-कर्मचारी व अधिकारी, सेवानिवृत्तीधारक यांना 10 लाख रुपयांची कॅशलेश मेडिकल पॉलिसी, ग्रामपंचायतकालिन समावेशन कामगारांना महापालिका स्थापनेच्या दिनांकापासून (1 ऑक्टोबर 2016) सेवा सुविधा देण्याबाबत सकारात्मक भूमिका घेण्यात आली तसेच कंत्राटी कामगारांना योग्य न्याय मिळवून देण्यात येईल, आश्वासित प्रगती योजना लागू करून फरकासह अंमलबजावणी येत्या डॉ. बाबासाहेब आंबेडकर जयंतीपूर्वी करण्यात येईल असे बैठकीत ठरले.
आयुक्त मंगेश चितळे यांच्या अध्यक्षतेखाली झालेल्या या बैठकीस अतिरिक्त आयुक्त कैलास गावडे, भाजपचे जिल्हा सरचिटणीस व माजी नगरसेवक नितीन पाटील, माजी नगरसेवक अजय बहिरा, आस्थापन विभाग प्रमुख दीपक सिलकन, योगेश्वर पाटील; तर संघटनेकडून कार्याध्यक्ष संतोष पवार, सरचिटणीस अनिल जाधव, कोषाध्यक्ष दत्तगुरू म्हात्रे, विभागीय अध्यक्ष शैलेश गायकवाड, ज्येष्ठ प्रतिनिधी अनंता पाटील, विश्राम म्हात्रे, हरेश कांबळे, रामा भोईते, निलेश म्हात्रे, राकेश परदेशी, निलेश जोमा म्हात्रे, विशाल गायकवाड, शांताराम म्हात्रे, कांतिलाल शेळके, प्रवीण भोईर, जीवन भेंडे, आकाश केणी, रवींद्र जाधव, विजय गावडे, रोशन चिमणे, प्रफुल्ल भगत, सचिन पाटील आदी उपस्थित होते.