प्रशिक्षकपदासाठी विराटची शास्त्रींनाच पसंती

नवी दिल्ली : वृत्तसंस्था

भारतीय संघाचा मुख्य प्रशिक्षक आणि इतर सपोर्ट स्टाफ यांच्यासाठी सध्या भारतीय क्रिकेट नियामक मंडळाने (बीसीसीआय) अर्ज मागवले आहेत. सध्या असलेले प्रशिक्षक रवी शास्त्री हे या पदावर कायम राहणार की नवे प्रशिक्षक टीम इंडियाला लाभणार याबाबत तर्कवितर्क लढवले जात आहेत. यादरम्यान कर्णधार विराट कोहलीने शास्त्रींनाच आपली पसंती दर्शविली आहे.

प्रशिक्षक निवडीसंदर्भात विराट म्हणाला, क्रिकेट सल्लागार समितीच्या पदाधिकार्‍यांनी अद्याप मला यासंदर्भात काहीही विचारलेले नाही. जर त्यांना माझे मत हवे असेल तर मी त्यांना नक्कीच मदत करेन. मी स्वतः जाऊन त्यांच्याशी संवाद साधेन. रवी शास्त्री यांच्याबाबत जर बोलायचे झाले, तर आमच्या संघाचा आणि त्यांचा चांगला मेळ जुळला आहे. त्यामुळे त्यांनाच या पदावर कायम ठेवण्यात आले तर मला आनंदच आहे.