टेबल टेनिस स्पर्धा उत्साहात; विजेत्यांना पारितोषिके

पनवेल : रामप्रहर वृत्त

राज्य क्रीडा व युवक सेवा संचालनालय आणि नवी मुंबई स्पोर्ट्स व सामाजिक विकास मंडळ पनवेल यांच्या संयुक्त विद्यमाने पनवेल महानगरपालिका व रायगड जिल्हा शालेय टेबल टेनिस स्पर्धा नुकतीच घेण्यात आली. नवीन पनवेल सेक्टर 18 येथील सिडको समाजमंदिरात ही स्पर्धा रंगली.

शिव छत्रपती राज्य क्रीडा पुरस्कार विजेते आणि रायगड जिल्हा टेबल टेनिस असोसिएशनचे संस्थापक व अध्यक्ष संजय कडू यांच्या मार्गदर्शनाखाली खेळल्या गेलेल्या या स्पर्धेचे उद्घाटन पनवेल महापालिकेच्या सहाय्यक आयुक्त तेजस्विनी गलांडे यांच्या हस्ते झाले. स्पर्धेत मुख्य पंच म्हणून पराग अंकोलेकर व राजेश कुरबेट यांनी काम पाहिले.

पनवेल महापालिका गट (विजेता व उपविजेता संघ) : 14 वर्षांखालील : मुले-बालभारती स्कूल खारघर, डीएव्ही पब्लिक स्कूल नवीन पनवेल़, मुली-डीएव्ही पब्लिक स्कूल, न्यू होरायजन पब्लिक स्कूल खांदा कॉलनी; 17 वर्षांखालील : मुले-डॉ. पिल्लई ग्लोबल स्कूल खांदा कॉलनी, रायन इंटरनॅशनल स्कूल खारघर, मुली-न्यू होरायजन पब्लिक स्कूल, सेंट जोसेफ स्कूल नवीन पनवेल; 19 वर्षांखालील : मुले-बालभारती  स्कूल, एपीजय स्कूल खारघर, मुली-बालभारती स्कूल खारघर, डीएव्ही पब्लिक स्कूल खारघर.

रायगड जिल्हा विजयी संघ (विजेता व उपविजेता संघ) : 14 वर्षांखालील : मुले-डीपीएस स्कूल पनवेल, अभिनव ज्ञानमंदिर कर्जत, मुली-एचओसी रसायनी; 17 वर्षांखालील : मुले-रिलायन्स फाऊंडेशन लोधिवली, डीपीएस स्कूल पनवेल, मुली-प्रभाकर पाटील कर्जत, एचओसी रसायनी; 19 वर्षांखालील : मुले-रिलायन्स फाऊंडेशन लोधिवली, आरसीएफ अलिबाग.

रायगड जिल्हा खो-खो असोसिएशनच्या कार्यवाहपदी आशिष पाटील यांची निवड

अलिबाग : प्रतिनिधी

रायगड जिल्हा कॅरम असोसिएशनच्या कार्यवाहपदी रायगड जिल्हा खो-खो संघाचा माजी कर्णधार राष्ट्रीय खेळाडू  आशिष पाटील याची निवड करण्यात आली. रायगडभूषण पुरस्कार विजेते दीपक मोकल यांची खजिनदारपदी निवड करण्यात आली.

रायगड जिल्हा खो-खो असोसिएशनची वार्षिक सभा नुकतीच अलिबाग येथील जनरल अरुणकुमार वैद्य विद्यालयात झाली. या सभेत जमाखर्च मंजूर करण्यात आला. छत्रपती पुरस्कार विजेते नथुराम पाटील यांनी शासकीय परिपत्रकानुसार वयोमर्यादेनुसार कार्यवाहपदाचा राजीनाम दिला होता. त्यांच्या राजीनाम्यामुळे रिक्त झालेल्या कार्यवाहपदी आशिष पाटील यांनी निवड करण्यात आली.

निलेश केणी यांनी खजिनदारपदाचा राजीनामा दिला होता. त्यामुळे रिक्त झालेल्या खजिनदारपदी दीपक मोकल यांची निवड करण्यात आली. रायगड जिल्हा खो-खो आसोसिएशनचे अध्यक्ष विजय मोरे, उपाध्यक्ष सूर्यकांत ठाकूर, सहकार्यवाह पुरुषोत्तम पिंगळे, बी. डी. गायकवाड, अमोल मोरे यांनी नथुराम पाटील यांनी क्रीडक्षेत्रात केलेल्या कार्याचा गौरव केला व नवीन पदाधिकार्‍यांना शुभेच्छा दिल्या.