हाफिजसाठी पाकची संयुक्त राष्ट्राकडे धाव

न्यूयॉर्क : वृत्तसंस्था

दहशतवाद्यांसाठी ‘नंदनवन’ असलेल्या पाकिस्तानचा नापाक चेहरा पुन्हा एकदा जगासमोर आला आहे. मुंबईवरील हल्ल्याचा सूत्रधार हाफिज सईदविरोधात टेरर फंडिंगचं प्रकरण सुरू असतानाच, पाकिस्ताननं त्याच्यासाठी संयुक्त राष्ट्रसंघात धाव घेतली आहे. महिन्याच्या खर्चासाठी हाफिजला बँक खात्याचा वापर करण्याची परवानगी द्यावी, अशी मागणी पाकिस्ताननं संयुक्त राष्ट्र संघाच्या सुरक्षा परिषदेकडे केली आहे. पाकिस्ताननं विनंती केल्यानंतर संयुक्त राष्ट्रसंघानं हाफिज सईदला बँक खात्याचा वापर करण्याची परवानगी देखील दिली आहे. यासंबंधी 15 ऑगस्टलाच पत्र पाठवले आहे. पाकिस्तानची ही विनंती मान्य केली आहे. कारण निश्चित कालावधीत कुणीच विरोध दर्शवला नाही, असं या पत्रात म्हटलं आहे. संयुक्त राष्ट्रसंघानं पत्रातून पाकिस्तान सरकारलाही यासंबंधी माहिती दिली आहे. हाफिज सईद, हाजी मोहम्मद अशरफ आणि जफर इक्बाल यांना किरकोळ खर्चासाठी त्यांच्या बँक खात्यांचा वापर करण्याची मुभा देण्यात आली आहे, असं या पत्रात नमूद करण्यात आलं आहे. हाफिजला खाते वापरण्याची मुभा देण्याच्या अर्जावर हरकत घेण्यासाठी 15 ऑगस्टपर्यंत मुदत देण्यात आली होती, मात्र कुणीही विरोध दर्शवला नाही. त्यामुळं त्याला परवानगी देण्यात आली, असं संयुक्त राष्ट्रसंघानं पत्रात नमूद केलं आहे. हाफिज सईदच्या कुटुंबात चार सदस्य आहेत आणि सर्वांची जबाबदारी त्याच्यावरच आहे. कुटुंबातील सदस्यांच्या खानपानाचा खर्च, कपडे आदींची व्यवस्था त्यालाच करावी लागत आहे. त्यामुळं त्याला बँक खाते वापरण्याची मुभा दिली जावी, अशी विनंती पाकिस्ताननं संयुक्त राष्ट्रसंघाकडे केली होती. हाफिजचे बँक खाते यूएनएससी ठराव 1267 अंतर्गत पाकिस्तान सरकारने गोठवले होते. त्याच्या खात्यात 11.50 लाख रुपये आहेत, अशी माहिती पाकिस्ताननं दिली होती. त्यामुळं आता दहशतवाद्यांविरोधात कारवाई करत असल्याचे ढोंग करणार्‍या पाकिस्तानचा खरा चेहरा जगासमोर आला आहे. दहशतवादाच्या मुद्द्यावरून अनेक देशांनी पाकिस्तानला खडे बोल सुनावले आहेत. त्यावर आम्ही दहशतवाद्यांविरोधात कारवाई करत आहोत, असा दावा पाकिस्तानकडून केला जात आहे. अलीकडेच टेरर फंडिंग प्रकरणात त्याला अटक केल्याचेही दाखवण्यात आले होते. दहशतवाद्यांवर केलेली कारवाई हे पाकिस्तानचा नाटकीपणा आहे, असे भारताने म्हटले होते आणि ते आता खरेही ठरताना दिसत आहे.