उरणच्या खारफुटी, पाणथळ जमिनी वाचवा

पर्यावरणप्रेमींची ठाकरे सरकारकडे मागणी

उरण : रामप्रहर वृत्त

विकासाच्या नावाखाली होणार्‍या विनाशावर लक्ष केंद्रीत करत नवी मुंबईतील पर्यावरणप्रेमींनी राज्याचे नवीन पर्यावरणमंत्री आदित्य ठाकरे यांच्याकडे खारफुटी आणि पाणथळ जागा वाचवण्यासाठी साकडे घातले आहे. पर्यावरणावर घाला घालणार्‍यांवर तत्काळ कारवाई करा आणि पर्यावरणाशी संबंधित प्रकरणे निकाली काढण्यासाठी विशेष ग्रीन पोलिसांची नेमणूक करा, अशी मागणीही त्यांनी केली आहे.

शहरातील खारफुटी, पाणथळ जमिनी, मिठागरे, वने आणि डोंगराळ भागांना वाचवण्याच्या संदर्भातील याचिकेसोबत पर्यावरणावर लक्ष केंद्रीत करणार्‍या नाटकनेक्ट फाऊंडेशन आणि श्री एकवीरा आई प्रतिष्ठान (एसइएपी) या संस्थांनी आदित्य ठाकरे यांना आरे हरित प्रदेशाला वन म्हणून घोषित करण्याच्या आणि त्याला वनखात्याला सोपवण्याच्या आपल्या निवडणुकीपूर्वी दिलेल्या वचनाची पूर्तता करण्याची विनंती केली आहे. ’मुंबईच्या मेट्रोपोलिटन परिसरात (एमएमआर) खारफुटी आणि पाणथळ जमिनींचा मोठ्या प्रमाणात विनाश होत आहे. पर्यावरणदृष्ट्या संवेदनशील उरण परिसरात नवी मुंबई सेझ, जेएनपीटी, जेएनपीटी सेझ, एनएचएआय आदी प्रास्तावित प्रकल्पांमुळे सरळ पर्यावरणाचा गळा घोटला जात आहे, असे ठाकरे यांच्या निदर्शनास आणून दिले आहे.

15 हजारांहून जास्त खारफुटींचा जेएनपीटीच्या चौथ्या कंटेनर टर्मिनलवर, एनएच-348 (पंजाब वेअरहाऊसेस सीएफएसजवळ) आणि एनएमएसइझेडच्या पागोटे साइटवर नाश करण्यात आला आहे. पागोटे येथे 100 एकर आणि भेळखंड येथे 150 एकर या दोन्ही एनएमएसइझेडच्या अंतर्गत असलेल्या पाणथळ जमिनी अनधिकृत लँडफिलमार्फत नष्ट करण्यात आल्या आहेत, असे नाटकनेक्ट फाऊंडेशनचे संचालक बी. एन. कुमार यांनी निवेदनात म्हटले आहे. ’उरणचा बहुतांश भाग, महाराष्ट्रातला सर्वांत मोठा किनारपट्टीचा पाणथळ जमिनीचा भाग आहे, जो आता धुळीचा परिसर बनला आहे. स्थानिक मासेमार समुदाय आणि 26 गावांना या पर्यावरणाचा समतोल घालवणार्‍या विकासाची किंमत मोजावी लागत आहे. मासेमारांचा उदरनिर्वाह आणि त्यांचे जीवन यामुळे संकटात आले आहे’, असे श्री एकवीरा आई प्रतिष्ठानाचे अध्यक्ष नंदकुमार पवार यांनी सांगितले आहे. तसेच स्थानिक मासेमारांचे अस्तित्व वाचवण्याची मागणीही त्यांनी केली.

ग्रीन पोलिसांची नेमणूक करा

सध्या या प्रकरणात गुन्हे दाखल झाले असले तरी अस्तित्वात असणारे पोलीस दल या पर्यावरण गुन्ह्यांना हाताळण्यासाठी सज्ज नसल्याचे सांगत यासाठी तत्काळ ग्रीन पोलिसांची नेमणूक करून त्यांच्याकडे हे प्रकरण चौकशीसाठी सोपवावे, यांसारख्या पर्यावरणाशी निगडित विषयांसाठी ग्रीन पोलीस ठाणे निर्माण करावीत, अशी मागणी ठाकरे यांच्याकडे करण्यात आली आहे.