Tuesday , February 7 2023

कामोठ्यातील व्यावसायिकाला फेसबुकवरील मैत्री भोवली

पनवेल : बातमीदार

फेसबुकवरून एका अनोळखी महिलेसोबत मैत्री करणे कामोठे सेक्टर 12 मधील एका व्यावसायिकाला चांगलेच महागात पडले आहे. या महिलेने परदेशातून एक कोटी 80 लाख रुपयांचे ड्राफ्ट आणल्याचे सांगून तसेच त्याचा प्राप्ती कर भरण्याचा बहाणा करून या व्यावसायिकाला वेगवेगळ्या बँकखात्यामध्ये तब्बल 39 लाख 90 हजार रुपये भरण्यास भाग पाडून त्याची फसवणूक केल्याचे उघडकीस आले आहे. कामोठे पोलिसांनी या प्रकरणातील अज्ञात टोळीविरोधात फसवणुकीसह आयटी अ‍ॅक्टनुसार गुन्हा दाखल केला आहे.

कामोठे सेक्टर 12मध्ये राहणार्‍या शंकरलाल सैनी (42) यांचा टाइल्स बसविण्याचा व्यवसाय आहे. ऑक्टोबर महिन्यामध्ये शंकरलाल याच्या फेसबुकवर एल्ला बेसील नावाच्या महिलेने फ्रेंड रिक्वेस्ट पाठविली होती. त्यावेळी शंकरलाल याने ही फ्रेंड रिक्वेस्ट स्वीकारल्यानंतर ते दोघे दोन-तीन महिने एकमेकांशी चॅट करत होते. त्यानंतर नोव्हेंबरमध्ये एल्ला बेसील या महिलेने भारतात फिरण्यासाठी येण्याचा बहाणा केला होता. त्यानंतर काही दिवसांतच सोनिया गुप्ता नामक महिलेने विमानतळावरील कस्टम विभागामधून बोलत असल्याचे सांगून शंकरलाल याच्याशी संपर्क साधला. त्यावेळी सोनिया हिने परदेशातून आलेल्या एल्ला बेसील हिच्याकडे सोन्याचे दागिने, लॅपटॉप, फोन सापडले असून ते सोडविण्यासाठी 45 हजार रुपये कस्टम चार्ज भरावे लागतील, असे शंकरलाल याला सांगितले. तिच्यावर विश्वास ठेवून शंकरलाल याने बँकेतून 45 हजार रुपये वळते केले. त्यानंतर सोनियाने पुन्हा फोन करून एल्ला बेसील या महिलेने तुमच्यासाठी एक कोटी 80 लाख रुपयांचे ड्राफ्ट आणल्याचे सांगून त्याचा प्राप्ती कर भरावा लागेल, असे सांगितले. मात्र शंकरलाल याने ही रक्कम भरण्यास नकार दिल्यानंतर या टोळीतील इतरांनी शंकरलाल याला रिझर्व्ह बँकेच्या नावाने ईमेल पाठवून तसेच फोन करून त्याला वेगवेगळी कारणे सांगून पैसे पाठविण्यास भाग पाडले. त्यानुसार शंकरलाल याने या टोळीला एकूण 39 लाख 90 हजार 600 रुपये पाठविले. मात्र त्यानंतरही या टोळीकडून आणखी रक्कम पाठविण्यास फोन येऊ लागल्यानंतर फसवणूक होत असल्याचे शंकरलाल याच्या लक्षात आले. त्यानंतर त्याने कामोठे पोलिसांकडे तक्रार दाखल केली.

Check Also

भाजप नेते संजय भगत यांच्या वाढदिवसानिमित्त धान्यवाटप

पनवेल : रामप्रहर वृत्त भाजप माथाडी ट्रान्सपोर्ट व सिक्युरिटी आणि महाराष्ट्र जनरल कामगार संघटना उपाध्यक्ष …

Leave a Reply