वाहनचोराला अटक; 11 दुचाकी हस्तगत

पनवेल : वार्ताहर

डुप्लिकेट चावीच्या सहाय्याने मोटरसायकल चोरणार्‍या तरुणाला वाहन चोरी प्रतिबंधक युनिटने अटक केली आहे. नदिम युसूफ शेख (30) असे या चोरट्याचे नाव असून, त्याने गेल्या तीन महिन्यांच्या कालावधीत नवी मुंबईच्या विविध भागातून दोन लाख 30 हजार रुपये किमतीच्या 11 दुचाकी चोरल्याचे उघडकीस आले आहे. पोलिसांनी ही सर्व वाहने जप्त केली आहेत. 

  या प्रकरणातील आरोपी नदिम शेख हा उलवे सेक्टर 20 भागात रहाण्यास असून, तो मागील वर्षी दुबई येथे चालक म्हणून कामासाठी गेला होता. गेल्या ऑक्टोबर महिन्यामध्ये तो दुबई येथून भारतात परतला होता. याठिकाणी त्याने कामाची शोधाशोध करण्याचा प्रयत्न केला, मात्र त्याच्या मनासारखे त्याला काम न मिळाल्याने त्याने मोटरसायकल चोरण्यास सुरुवात केली. डुप्लिकेट चावीने अथवा मोटरसायकलच्या केबल्स डायरेक्ट जोडून तो काही मिनिटांत मोटरसायकल चोरुन नेण्यास सुरुवात केली. अशा पद्धतीने आरोपी नदिम शेख याने गत तीन महिन्यांच्या कालावधीत नेरूळमधून नऊ; तर वाशी आणि मुंबईतून प्रत्येकी 1 अशा अकरा मोटरसायकल चोरल्या होत्या. दरम्यान, नव्याने स्थापन झालेल्या वाहन चोरी प्रतिबंधक युनिटचे वरिष्ठ पोलीस निरीक्षक शिरीष पवार व त्यांच्या पथकाने वाहन चोरीचे प्रमाण जास्त असलेल्या नेरूळमधील वाहन चोरीचा तपास सुरु केला. या तपासादरम्यान पोलिसांना तेथील काही सीसीटीव्ही फुटेजमध्ये आरोपी नदिम शेख निदर्शनास आला होता. त्यामुळे पोलिसांनी त्याची शोधाशोध सुरू केली होती. अखेर पोलिसांनी पांढर्‍या रंगाच्या चपलांवरून त्याचा ठावठिकाणा शोधून त्याला अटक केली. त्यानंतर त्याने चोरलेल्या 11 मोटरसायकल पोलिसांनी त्याच्याकडून हस्तगत केल्या. 

• चपलांमुळे चोर जाळ्यात

आरोपी नदिम शेख याने पांढर्‍या रंगाच्या चपला घातल्याचे काही सीसीटीव्ही फुटेजमध्ये पोलिसांच्या निदर्शनास आले होते. पांढर्‍या रंगाच्या चपला वापरणारे हे कमी असल्याने पोलिसांनी अशा प्रकराचे चप्पल घालणार्‍यांचा शोध घेण्यास सुरुवात केली होती. अखेर पांढर्‍या रंगाची चप्पल घालणारा उलवे भागात रहाण्यास असल्याची माहिती मिळाल्यानंतर वाहन चोरी प्रतिबंधक युनिटने उलवे भागातून आरोपी नदिम शेख याला अटक केली. नदिमने चोरलेल्या सर्व मोटरसायकल तो राहात असलेल्या उलवे भागात आजुबाजुच्या परिसरात वेगवेगळ्या ठिकाणी पार्क कररून ठेवल्या होत्या. या सर्व मोटरसायकल विकण्यासाठी तो ग्राहकांच्या शोधात होता, मात्र त्या अगोदरच पोलिसांनी त्याला अटक केली.