मुंबईत पुन्हा रक्तटंचाई!

वाढत्या कोरोना रुग्णांमुळे दात्यांच्या संख्येत घट

मुंबई : प्रतिनिधी

कोरोना रुग्णांची संख्या पुन्हा हळुहळू वाढत असताना मुंबईमध्ये रक्ताचाही तुटवडा निर्माण झाला आहे. प्रत्येक वर्षी मार्च, एप्रिल आणि मे महिन्यामध्ये कॉलेजांना सुटी असल्यामुळे तसेच रक्तदातेही गावी गेल्यामुळे टंचाई निर्माण होते. यंदा मात्र कोरोना संसर्गाच्या भीतीमुळे रक्तदानाची अडचण निर्माण झाली आहे. जोपर्यंत इच्छुक रक्तदात्यांची नवी फळी तयार होत नाही, तसेच रक्तदानाचे योग्य प्रकारचे नियोजन केले जात नाही, तोपर्यंत रक्ताच्या तुटवड्याची समस्या वारंवार भेडसावत राहील, असे मत वैद्यकीय तज्ज्ञ व्यक्त करीत आहेत.

एरवी वर्षभर रक्तदान शिबिरांचे आयोजन केले जाते. त्यामुळे रक्ताचा तुटवडा भरून निघतो. कोरोना संसर्गाच्या भीतीमुळे मागील मार्चपासून रक्ताची चणचण भेडसावत आहे. संसर्गाच्या धास्तीमुळे रक्तदान शिबिरांचे आयोजन करणेही शक्य होत नाही. राज्य रक्त संक्रमण परिषदेला देण्यासाठी रक्तपेढ्यांकडून जी माहिती दिली जाते, त्या माहितीनुसार 15 मार्च रोजी केईएम रुग्णालयामध्ये रक्ताच्या केवळ 28 पिशव्या होत्या. थॅलेसेमियाच्या 280 रुग्णांना रक्तासाठी सातत्याने मदत करणार्‍या लो. टिळक रुग्णालयामध्ये केवळ 30 पिशव्या रक्त उपलब्ध होते. राजावाडी रुग्णालयामध्येही 13 तर गर्भवती व महिलांना वैद्यकीय सेवा पुरवणार्‍या कामा रुग्णालयाकडे 12 पिशव्या रक्त आहे. त्यामुळे प्रसूतीकाळात जर रक्ताची अडचण निर्माण झाली, तर कुठे जायचे हा प्रश्न नातलगांना भेडसावत आहे. दुर्मिळ रक्तगटासाठी तर नातलगांना धावपळ करावी लागते. इंडियन रेडक्रॉस सोसायटीमध्येही रक्ताची उपलब्धता मागील अनेक दिवसांपासून शून्य आहे. ’राज्यात पुन्हा रक्ताची टंचाई भेडसावत आहे. त्यावरील उपाययोजनांसाठी बैठकीचे आयोजन करण्यात आले होते. मुंबईत सध्या चार हजार तर राज्यात चाळीस हजार रक्तपिशव्यांची उपलब्धता आहे’, असे राज्य रक्त संक्रमण परिषदेच्या डॉ. अरुण थोरात यांनी सांगितले.

पिशव्या, चाचणी किटचाही तुटवडा

रक्ताच्या पिशव्यांची उपलब्धता पूर्वी केंद्र सरकारच्या सहकार्याने होत होती. मात्र या पिशव्या आणि वेगवेगळ्या प्रकारच्या रक्ताच्या तपासण्या करणार्‍या किटही सध्या उपलब्धता नाहीत. खासगी रक्तपेढ्यामध्ये हेपॅटायटिस बी व सी यांसारख्या चाचण्यांसाठी पालिकेने केलेल्या दरनिश्चितीपेक्षा अधिक आकारणी केल्याचा अनुभव रक्तपेढ्यांमधील वैद्यकीय तज्ज्ञांनी सांगितला.