कोविडच्या बिलाबाबत मिळणार दिलासा

नवी मुंबईत तक्रार निवारण कक्ष कार्यन्वित

देयकाचे होणार लेखापरीक्षण

नवी मुंबई : रामप्रहर वृत्त

खासगी रुग्णालयांकडून कोविड-19 विषयक उपचारांदरम्यान आकारण्यात येणार्‍या बिलांबात नागरिकांच्या तक्रार निवारणासाठी नवी मुंबई महानगरपालिकेने कोविड-19 बिल तक्रार निवारण कक्ष कार्यन्वित केला आहे. या तक्रार निवारण कक्षात प्राप्त तक्रारींचे निराकरण करण्यासोबतच रुग्णाचा डिस्चार्ज होण्यापूर्वी रुग्णालयांकडून संभाव्य देयक घेऊन त्याची पडताळणी केली जात आहे.

महापालिका आयुक्त अभिजित बांगर यांनी हे कामकाज अधिक प्रभावीपणे व्हावे आणि रुग्णांना तसेच त्यांच्या नातेवाइकांना दिलासा मिळावा यासाठी नुकताच याबाबतचा आढावा घेतला. रूग्णालयामार्फत डिस्चार्जपूर्वी देण्यात येणार्‍या संभाव्य देयकांचे लेखा परीक्षण त्याच ठिकाणी करण्याच्या दृष्टीने कोविड-19 वर उपचार करणार्‍या रुग्णालयामध्ये महानगरपालिकेचा अधिकारी नियुक्त करावा, असे निर्देश दिले. या वेळी समितीच्या प्रमुख अतिरिक्त आयुक्त सुजाता ढोले, मुख्य लेखा आणि वित्त अधिकारी धनराज गरड, समितीचे नियंत्रण अधिकारी राजेश कानडे, वैद्यकीय आरोग्य अधिकारी डॉ. धनवंती घाडगे उपस्थित होते.

देयकांच्या पोस्ट ऑडिटपेक्षा प्री ऑडिट करणे रुग्णांच्या आणि नातेवाइकांच्या दृष्टीने आर्थिक हिताचे आणि सुविधेचे आहे हे लक्षात घेऊन रुग्णालयांमध्ये देयकांच्या लेखा परीक्षणासाठी अधिकारी नेमण्याचे निश्चित करण्यात आले आहे. नवी मुंबई महानगरपालिकेच्या रुग्णालयात नियुक्त अधिकार्‍याने देयकांचे लेखा परीक्षण केल्यानंतरच रुग्णाच्या नातेवाइकांनी देयक अदा करावयाचे आहे. त्यास अनुसरून रुग्णालयांची बेड्स क्षमता लक्षात घेऊन तेवढ्या संख्येने अधिकार्‍यांची नेमणूक करावी, असे निर्देश आयुक्तांनी दिले.

कोविड-19रुग्णांवरील उपचारांची देयके तपासणी करताना कोव्हिडपश्चात निदान होणार्‍या म्युकरमायकोसिस वरील उपचारांचीही देयके तपासावी, असेही आयुक्तांनी सूचित केले. त्याचप्रमाणे म्युकरमायकोसिसचे उपचार हे सुपर स्पेशालिटी रुग्णालयांमध्येच होऊ शकतात, हे लक्षात घेऊन तशा प्रकारच्या अद्ययावत सुविधा असणार्‍या रुग्णालयांनीच म्युकरमायकोसिसचे रुग्ण उपचारासाठी दाखल करून घ्यावेत, असेही आयुक्तांनी निर्देशित केले.

अशा प्रकारे करा संपर्क

देयके आकारणे रुग्णालयांना बंधनकारक असून त्याबाबत रुग्ण आणि त्यांच्या नातेवाइकांच्या काही तक्रारी असल्यास नवी मुंबई महानगरपालिकेच्या कोविड बिल तक्रार निवारण कक्ष येथे 022-27567389 या क्रमांकावर संपर्क साधावा, तसेच रुग्णालयातून डिस्चार्ज घेतल्यानंतर तक्रार दाखल करावयाची असल्यास ललललऽपाालेपश्रळपश.लेा या ई मेल आयडीवर अथवा 7208490010 या व्हॉट्सअ‍ॅप क्रमांकावर बिलाच्या प्रती पाठवाव्यात, असे आवाहन महापालिका आयुक्त अभिजित बांगर यांच्या वतीने करण्यात येत आहे.