पाच महिन्यानंतर गजबजले रायगडचे किनारे

अलिबाग : प्रतिनिधी

कोरोनाचा प्रादुर्भाव कमी होऊ लागल्यामुळे सरकारने निर्बंध हळूहळू सैल करण्यास सुरुवात केली आहे. त्यामुळे पर्यटकांची पावले आता रायगडच्या किनार्‍यांकडे वळू लागली आहेत. रायगडमधील अलिबागसह नागाव, किहीम, काशीद, मुरूड इथल्या समुद्र किना़र्‍यांवर पर्यटक दिसू लागले आहेत. शनिवार, रविवार, सोमवार अशा सलग तीन दिवसांच्या सुटीमुळे पर्यटक मोठ्या संख्येने रायगडमध्ये दाखल झाले आहेत. पाच महिने घरात कोंडून बसलेले लोक आता इथल्या किना़र्‍यांवर मोकळा श्वास घेत आहेत.

देशभरात मार्च महिन्यापासून कोरोनाच्या दुसर्‍या लाटेला सुरूवात झाली आणि सारेच व्यवहार ठप्प झाले. निर्बधांमुळे रायगडमधील पर्यटन व्यवसायावर मोठा परिणाम झाला. सर्व पर्यटनस्थळांवर फिरण्यास बंदी घालण्यात आली. त्यामुळे पर्यटक इकडे फिरकेनासे झाले. या व्यवसायावर अवलंबून असलेले टपरीधारक, हॉटेल, लॉजींग मालक, घोडागाडी, उंटसवारी, वॉटरस्पोर्टस या सर्वांवरच त्याचा परिणाम झाल्याचे दिसून आले.

गेले पाच महिने हे निर्बध होते. आता कोरोनाचा प्रादुर्भाव खूपच कमी झाला आहे. रूग्णसंख्यादेखील अटोक्यात आली आहे. त्याबरोबरच पर्यटन व्यवसायावरील निर्बंधदेखील सैल करण्यात आले आहेत. त्यामुळे पर्यटकांची पावले आता रायगडच्या किनार्‍यांकडे वळली आहेत. सध्या रायगडात येणार्‍या पर्यटकांमध्ये मुंबई आणि पुण्यातील पर्यटकांची संख्या अधिक आहे.

पाच महिन्यानंतर मोकळा श्वास घ्यायला मिळाल्याने पर्यटक खुश आहेत. बच्चे कंपनीदेखील आनंदली आहे. समुद्रात डुंबण्याबरोबरच वेगवेगळ्या खेळांचा आस्वाद घेत आहेत. अनेक कर्मचारी अजूनही वर्क फ्रॉम होम करीत आहेत. त्यामुळे कामानिमित्त का होईना घराबाहेर पडणं होत नव्हते. त्यांनादेखील यामुळे दिलासा मिळाला आहे. रोजच्या कामातून दोन दिवस विरंगुळा मिळतो आहे.

पर्यटकांच्या आगमनाने व्यावसायिकांमध्ये समाधानाचे वातावरण आहे. गेले पाच महिने पर्यटनावर आधारीत सर्व व्यवसाय ठप्प होते. हॉटेल, लॉजेस बरोबरच छोटे व्यावसायिक यांनादेखील याचा मोठा फटका बसला होता. कुटुंबाच्या उदरनिर्वाहाचा प्रश्न निर्माण झाला होता. परंतु आता हे व्यवसाय हळूहळू सुरू होत आहेत. त्यामुळे त्यांचीही रोजी रोटी सुरू झाली आहे.