चेन्नई ‘प्ले ऑफ’मध्ये

हैदराबादवर विजय; वॉटसनची दमदार खेळी

हैदराबाद : वृत्तसंस्था

सलामीवीर शेन वॉटसनचे आक्रमक अर्धशतक आणि त्याला इतर फलंदाजांनी दिलेली मोलाची साथ या जोरावर चेन्नई सुपरकिंग्ज संघाने सनरायझर्स हैदराबादवर सहा गडी राखून विजय मिळविला. या विजयासह चेन्नईने पुन्हा एकदा आपले पहिले स्थान कायम राखत प्ले-ऑफमधील स्थान जवळपास निश्चित केले आहे.

हैदराबादने दिलेल्या 176 धावांचा पाठलाग करताना चेन्नईची सुरुवात अतिशय खराब झाली होती. फाफ डु प्लेसिस स्वस्तात धावबाद होऊन माघारी परतला. यानंतर सुरेश रैना आणि शेन वॉटसन जोडीने चेन्नईचा डाव सावरला. राशिद खानने रैनाचा अडसर दूर करीत चेन्नईला दुसरा धक्का दिला, पण वॉटसनवर अंकुश लावणे हैदराबादच्या गोलंदाजांना जमले नाही. वॉटसनने मैदानाच्या चौफेर फटकेबाजी करीत हैदराबादच्या गोलंदाजांना सळो की पळो करून सोडले. शतकासाठी अवघ्या 4 धावा असताना तो भुवनेश्वर कुमारच्या गोलंदाजीवर माघारी परतला.

यानंतर विजयासाठी आवश्यक असलेल्या धावा केदार जाधव-अंबाती रायुडू जोडीने पूर्ण करीत आणल्या होत्या, मात्र अखेरच्या षटकात विजयासाठी अवघी एक धाव हवी असताना रायडू माघारी परतला, परंतु चेन्नईने अखेरीस आपल्या विजयावर शिक्कामोर्तब केले. हैदराबादकडून राशिद खान, संदीप शर्मा आणि भुवनेश्वर कुमारने प्रत्येकी एक गडी बाद केला; तर चेन्नईचा एक फलंदाज धावबाद झाला.

त्याआधी, मनीष पांडे आणि डेव्हिड वॉर्नरने केलेल्या अर्धशतकी खेळाच्या जोरावर सनरायझर्स हैदराबाद संघाने 175 धावांपर्यंत मजल मारली. केन विल्यमसनच्या अनुपस्थितीत खेळणार्‍या हैदराबादने चेन्नईच्या गोलंदाजांचा व्यवस्थित समाचार घेतला. हैदराबादकडून वॉर्नरने 57 आणि पांडेने नाबाद 83 धावा केल्या. चेन्नईकडून हरभजन सिंहने दोन,  दीपक चहरने एक बळी घेतला. याव्यतिरिक्त चेन्नईच्या एकाही गोलंदाजाला यश मिळाले नाही.

हैदराबादचा जॉनी बेअरस्टो आजच्या सामन्यात फारशी चमक दाखवू शकला नाही. हरभजन सिंहच्या गोलंदाजीवर धोनीने बेअरस्टोचा झेल घेतला. यानंतर वॉर्नर आणि पांडेने दुसर्‍या विकेटसाठी 115 धावांची भागीदारी केली. या दोन्ही फलंदाजांनी चेन्नईच्या गोलंदाजांचा समाचार घेत संघाला आव्हानात्मक धावसंख्या उभारून दिली. वॉर्नर माघारी परतल्यानंतर विजय शंकरने पांडेला साथ दिली. अखेरच्या षटकात फटकेबाजी करताना शंकरही माघारी परतला. दीपक चहरने त्याचा बळी घेतला. अखेरीस, पांडेने युसूफ पठाणच्या मदतीने संघाला 175 धावांचा टप्पा गाठून दिला.