मुंबईतील मिल कामगारांच्या संपाप्रमाणेच एसटी संपाची अवस्था करण्याचा डाव

आमदार गोपीचंद पडळकरांचा राज्य सरकारवर आरोप

मुंबई ः प्रतिनिधी
राज्यातील संपकरी एसटी कर्मचारी विलिनीकरणाच्या मागणीवर ठाम असताना परिवहनमंत्री अनिल परब यांनी येत्या सोमवारनंतर संपकर्‍यांना मेस्मा कायदा लावण्याचा इशारा दिला आहे. यावरून भाजप आमदार गोपीचंद पडळकर यांनी टीका करीत मुंबईतील मिल कामगारांच्या संपाप्रमाणेच एसटी संपाचीही अवस्था करण्याचा डाव असल्याचा आरोप केला आहे.
परिवहनमंत्री अनिल परब यांनी शुक्रवारी पत्रकार परिषद घेत पगारवाढ आणि वेतनहमीनंतरही एसटी कर्मचारी संपावर ठाम असल्यामुळे आता राज्य सरकारकडून त्यांना सोमवारपर्यंतचा अल्टीमेटम दिला आहे. सोमवारपर्यंत कर्मचारी कामावर रूजू झाल्यास त्यांचे निलंबन मागे घेण्यात येईल, तर त्यानंतर रूजू न झाल्यासमात्र कठोर कारवाई केली जाईल, असा इशारा परब यांनी दिला आहे.
या मुद्द्यावरून आमदार गोपीचंद पडळकर यांनी परिवहनमंत्री अनिल परब यांच्यावर निशाणा साधला आहे. परबांनी आपले अपयश झाकण्यासाठी मी आणि सदाभाऊ खोत एसटी कर्मचार्‍यांची डोकी भडकवत आहेत, असा आरोप केला, पण तीन आठवड्यांचा कालावधी उलटल्यानंतरही ते आपल्या विभागाच्या कर्मचार्‍यांचा विश्वास संपादन करण्यासाठी मंत्री म्हणून अपयशी ठरले आहेत. आता ते मुघलशाही पद्धतीने मेस्मा लावण्याची धमकी देत आहेत. त्याचा मी निषेध करतो, असे आमदार पडळकर म्हणाले.
मनापासून कर्मचार्‍यांचा विश्वास संपादन केला असता तर आज नक्कीच काहीतरी मार्ग निघाला असता. मुंबईत मिल कामगारांचा संप झाला. तो संप चिघळवला गेला आणि तसाच अनिर्णीत ठेवून मिल मालकांशी हातमिळवणी करीत कोट्यवधींच्या जागा लाटल्या गेल्या, त्या जागांमध्ये मोठा घोटाळा केला गेला. त्याच पद्धतीने एसटी कर्मचार्‍यांचा संप चिघळवून विविध ठिकाणच्या मोक्याच्या जागांची विल्हेवाट लावण्याचा डाव परब आणि सरकारचा दिसतोय, असा आरोपही आमदार पडळकरांनी केला.