Breaking News

धोनीबरोबर या खेळाडूंचाही हा शेवटचा वर्ल्डकप

मुंबई : प्रतिनिधी

स्वतःच्या देशाला एकदा तरी वर्ल्डकप जिंकवून द्यायचं स्वप्न प्रत्येक क्रिकेटपटू बघतो. काहींचं हे स्वप्न पूर्ण होतं, तर कित्येकांचं हे स्वप्न अपूर्ण राहतं. इंग्लंडमध्ये सुरू होणार्‍या क्रिकेट वर्ल्डकपमध्येही अशाच प्रकारे खेळाडू जिंकण्याचं स्वप्न घेऊन मैदानात उतरतील. भारताच्या दृष्टीनं विचार केला, तर काही खेळाडूंचा हा शेवटचा वर्ल्डकप असू शकतो. 30 मेपासून इंग्लंडमध्ये वर्ल्डकपला सुरुवात होणार आहे. धोनीसह असे पाच भारतीय खेळाडू आहेत, जे 2023 सालचा वर्ल्डकप खेळू शकणार नाहीत. या खेळाडूंवर एक नजर टाकू या.

केदार जाधवचा पहिला आणि शेवटचा वर्ल्डकप केदार जाधव हा सध्या टीममध्ये ऑल राऊंडर म्हणून खेळत आहे. केदार जाधवची भारतीय टीममधील भूमिका फिनिशर आणि स्पिनर म्हणून आहे. 2019 चा वर्ल्डकप सुरू होईल तेव्हा केदार जाधवचं वय 34 वर्ष असेल, तर 2023 पर्यंत केदार जाधव 38 वर्षांचा होईल. त्यामुळे हा केदारचा पहिला आणि शेवटचा वर्ल्डकप ठरू शकतो.

शिखर धवनचा दुसरा वर्ल्डकप

शिखर धवन आणि रोहित शर्मा हे फक्त भारताचेच नाही तर जगातले सगळ्यात यशस्वी ओपनर आहेत. आयसीसीच्या स्पर्धांमध्ये शिखर धवनची बॅट नेहमीच तळपते. त्यामुळे या वर्ल्डकपमध्ये त्याचं खेळणं जवळपास निश्चित आहे. 2015 सालच्या वर्ल्डकपमध्ये धवन हा 5वा सर्वाधिक स्कोअर करणारा खेळाडू होता. पण जास्त काळ फॉर्ममध्ये न राहणं धवनची कमजोरीही आहे. 2019 मध्येच शिखर धवन दोन वेळा शून्यावर आऊट झाला आहे. देशातले अनेक ओपनर हे भारतीय टीममध्ये प्रवेश करण्यासाठी दार ठोठावत आहेत. धवन हा सध्या 33 वर्षांचा आहे. 2023 वर्ल्डकपपर्यंत धवन 37 वर्षांचा होईल.

रायुडूचा पहिला आणि शेवटचा वर्ल्डकप

भारतीय टीममध्ये सध्या अंबाती रायुडू हा चौथ्या क्रमांकावर खेळत आहे. चौथ्या क्रमांकासाठी रायुडू हा आदर्श खेळाडू असल्याचं कोहलीनं सांगितलं होतं. त्यामुळे वर्ल्डकपमध्ये रायुडू चौथ्या क्रमांकावरच खेळेल हे जवळपास निश्चित आहे. असं असलं तरी प्रशिक्षक रवी शास्त्रींनी दिलेल्या संकेतानुसार भारतीय टीम चौथ्या क्रमांकासाठी वेगळ्या खेळाडूचाही विचार करु शकते. अंबाती रायुडू हा सध्या 33 वर्षांचा आहे. त्यामुळे पुढच्या वर्ल्डकपमध्ये तो खेळणार नाही हे जवळपास निश्चित आहे.

धोनी शेवटचा वर्ल्डकप जिंकवणार?

धोनीच्या नेतृत्वात भारतानं 2 वर्ल्डकप जिंकले आहेत. 2007 सालच्या टी-20 वर्ल्डकपमध्ये आणि 2011 सालच्या 50 ओव्हरच्या वर्ल्डकपमध्ये भारताचा विजय झाला. धोनी हा सध्या 37 वर्षांचा आहे, त्यामुळे तो 2023 सालचा वर्ल्डकप खेळणार नाही. अशात धोनी भारताला तिसरा वर्ल्डकप जिंकवून देण्यासाठी मैदानात उतरेल.

दिनेश कार्तिकचाही शेवटचा वर्ल्डकप?

33 वर्षांचा दिनेश कार्तिक पाचवा असा खेळाडू आहे ज्याचा हा शेवटचा वर्ल्डकप असू शकेल. दिनेश कार्तिक हा मागच्या महिन्यापर्यंत भारतीय टीमचा महत्त्वाचा भाग होता, पण आता परिस्थिती बदलली आहे. भारताच्या वनडे टीममधून कार्तिकला डच्चू देण्यात आला आहे. काही दिवसांपूर्वी दिनेश कार्तिकचा विचार फिनिशर म्हणून केला जात होता, पण आता केदार जाधवकडे ही भूमिका देण्यात आली आहे. असं असलं तरी दिनेश कार्तिककडून अपेक्षा संपलेल्या नाहीत. कारण ऋषभ पंतनं अजून मर्यादित ओव्हरमध्ये चमकदार कामगिरी केलेली नाही. अशात पुन्हा एकदा दिनेश कार्तिकचा वर्ल्डकपच्या टीमसाठी विचार होऊ शकतो.

Check Also

न्हावे येथील सरपंच चषक क्रिकेट स्पर्धेचे लोकनेते रामशेठ ठाकूर यांच्या हस्ते उद्घाटन

पनवेल : रामप्रहर वृत्त पार्थ इंटरप्रायझेसच्या वतीने सरपंच चषक 2024 क्रिकेट स्पर्धा न्हावे येथे आयोजित …

Leave a Reply